啱啱先過完農曆新年，話咁快下個星期五就輪到一連五日復活節同清明節假期，費清原本諗住同父母等一家大細去日本賞櫻，點知機票、酒店貴到飛起，兼機位難求。費清阿媽話都好耐冇去澳門，不如近近哋去澳門玩兩日。
提起澳門，費清即刻諗起大批內地同胞逼爆大馬路嘅情境，同高昂嘅消費。不過，既然母親大人下旨，費清都冇得Say No，立刻搵過咗澳門做嘢幾年、已經係半個澳門人嘅興哥，問佢有乜平靚正好介紹。
興哥話想喺澳門食平價自助餐同用特價旅遊玩樂，就去義字街街市，佢話呢個街市係一個小販認可區，類似香港嘅女人街，基本上冇遊客去，係當地澳門人嘅街市。佢話喺嗰度有舖頭仔旅行社，兼賣特價飛，包括酒店自助餐、澳門威尼斯人度假村嘅貢多拉船飛等。佢話部份五星級酒店自助餐可以平到半價，貢多拉船飛亦有七折，若以成人票價一百二十八蚊澳門幣計，七折後只需九十蚊，足足可以慳番三十八蚊，一家大細就可以慳番百幾蚊。
興哥仲話除咗義字街街市，澳門新口岸皇朝區，即係澳門維景酒店、廣州街同北京街，都有好多當地旅行社有得賣呢啲特價飛。
費清聽落好似好吸引，但點解啲飛可以賣咁平？會唔會有假飛㗎？興哥叫費清放心，佢話呢啲特價飛係經澳門賭廳同大旅行社大批攞，所以平啲，唔係假嘢，澳門人之間亦有好多人放售。
費清 ＃要生計，也要生活＃毋忘初衷
